2013

2013
Dr Edward Snowden het die amerikanisch NSA verpfiffe und dr Wält u. a. s Überwachigsbrogramm PRISM verroote und eso en Überwachigs- und Spionaascheaffäre usglööst.
Dr Bapst Benedikt XVI. verzichdet as erste Bapst sit mee as 700 Joor uf si Boste; si Noochfolger wird dr Franziskus as erste Latiinamerikaner.
Demonstrazione und Akzione vo Bürger in dr Türkei gege d Regierig vom Recep Tayyip Erdoğan.
Noch Brotest gege die islamistischi Regierig vom Mursi in Egüpte stürzt d Armee dr Mursi und übernimmt d Macht.

S Joor 2013 isch wie s Joor vorhäär vom Arabische Früelig und sine Folge brägt gsi. Z Sürie isch dr Bürgerchrieg witergange; z Egüpte isch dr gweelt Staatsbresidänt Mohammed Mursi vom Milidär abgsetzt worde. Au in dr Türkei, in Thailand und in dr Ukraine het s immer wider Bürgerbrotest gee.

Dr ehemoolig Mitarbäiter vom amerikanische Ghäimdienst NSA Edward Snowden het däm sini Spionaaschedäätikait öffentlig gmacht und d NSA-Affäre usglööst, wo zu internazionale Brotest gegen e Ghäimdienst vo de Veräinigte Staate gfüert het.

Öiropa isch immer no vo dr Eurokrise gschüttlet worde. Bsundrigs stark betroffe si Griecheland, Spanie, Bordugal, Italie und Züpere gsi und in dene Länder isch s zu Brotest gege d Krisepolitik vo dr Öiropäische Union und gege d Politik vo de äigene Regierige choo. Irland het im Dezämber uf e Öiro-Rettigsschirm chönne verzichde.

Im Februar isch zum erste Mol sit 1294 e Babst zruggdrätte, dr Benedikt XVI.. Am 13. Merz isch dr erst Latiinamerikaner, dr Franziskus zum Bischof vo Rom gweelt worde. Er het verkündet, ass in Zuekumft die katholischi Chille sterker für die Arme wurd doo si.

Am 22. Septämber 2013 isch z Dütschland dr Bundesdaag nöi gweelt worde. Zum erste Mol het d FDP d 5-Brozänt-Hürde nid chönne nee, und isch nüme im Bundesdaag verdrätte. Vier Joor Schwarz-gääli Koalizion si z Änd gange. CDU und SPD hai under dr Bundeskanzlere Angela Merkel e Groossi Koalizioon bildet.