68er-Bewegung

Under em Schlagwort 68er-Beweegig wärde internazionali und politisch linggsgrichdeti Bürgerrächtsbeweegige zämmegefasst, wo in dr Middi vo de 1960er Joor aktiv worde si. Si häi mit de Brotest vo amerikanische Bürgerrächtler aagfange. Au in Öiropa het s intensivi zivili Komflikt gee. Noch em Bau vo dr Berliner Muure am 13. August 1961 het sich dr Fokus vom Ost-West-Konflikt verlaageret, und die sowjetisch-chinesische Spannige und d Stellverdräterchrieg, wie si in Vietnam gfüert worde si, si in Vordergrund cho. Die kubanischi Revoluzioon, die ersti Eskalazioon im amerikanische Chrieg z Vietnam, d Klassekämpf im Kongo und d Revoluzioon z Algerie häi s Dänke in e nöiji Richdig glänkt. 1968 häi sich d Komflikt verscherft, wo vo dene Beweegige thematisiert worde si. In de USA isch s zu Demonstrazioone gegen e Vietnamchrieg cho und gegen e Mord am Theolog und Bürgerrächtler Martin Luther King. D Intensivierig vom Vietnamchrieg isch für die Nöiji Linggi e zentrale Bezugspunkt worde, wo sä zum ene globale Fenomeen gmacht häi.