Abstentzio

Abstentzioa hauteskunde edo erreferendum batean botorik ez ematea da. Herrialdeen arabera, abstentzioa eskubidea edo delitua (bozkatzea derrigorrezkoa den estatuetan) izan daiteke.

Bozkatzea derrigorrezkoa ez den herrialdeetan, abstentzio portzentaje bat beti ematen da, abstentzio pasiboari egotzi ohi zaiona. Abstentzio pasiboaren eta aktiboaren artean bereizketa argia egitea zaila bada ere, lehenak ez bozkatzeko erabaki soila islatzen duen bitartean, abstentzio aktiboa erabaki politiko baten isla da. Historikoki, mugimendu anarkistek abstentzio aktiboaren aldeko hautua egin dute, sistema politiko ordezkatzailearen aurkako ekintza politiko gisa. Halaber, abstentzio aktiboa hauteskunde edo erreferendum baten aurkako protesta bitartekoa izan ohi da.