Al-Mawardi

Abu al-Hasan Ali bin Muhammad bin Habib al-Mawardi (Arab: أبو الحسن علي بن محمد بن حبيب الماوردي), utawa kondhang kanthi aran Imam Al-Mawardi (Bashrah, k. 364 H/974 M - Baghdad, 450 H/1058 M), ya iku salah sawijining ngulama ahli pulitik lan fikih Islam kang lair ing Bashrah (saiki ing nagara Irak).^[1]

Nalika enomé, Al-Mawardi sampun sinau manèka warna èlmu agama marang para guruné ing Bashrah lan Baghdad. Ing Bashrah, panjenengané sinau èlmu fikih Syafi'i saka Abul Qasim Abdul Wahid ash-Shimari, lan èlmu kadis saka Hasan bin Ali al-Jayli, Muhammad bin Ma'ali al-Azdi, lan Muhammad bin 'Adi al-Munqari. Sawisé iku, ing Baghdad panjenengané nerusaké sinau èlmu-èlmu hukum, sastra, lan basa Arab saka Abdullah al-Baqi lan Abdul Hamid al-Isfarayni.^[2][3][4]

Al-Mawardi iku ulama kang nganut madahab Syafi'i.^[3] Panjenengané dianggep wong kang ahli hukum, lan asring ditunjuk minangka hakim (qadi) ing mangsa kakuwaosan Bani Abbasiyah.^[3] Kajaba iku, panjenengané uga diwènèhi tugas minangka utusan ing rundhingan antarané para khalifah Bani Abbasiyah lan para sultan Bani Buwaihiyah.^[3] Ing babagan èlmu kawruh, Al-Mawardi sajatiné ngasilaké akèh karya seratan, nanging kang isih bisa tinemu mung bab 12 judhul waé. Karya-karya mau ya iku:^[3][5]

• An-Nukat wa al-'Uyun fi Tafsir al-Qur'an al-Karim (tapsir)
• Al-Hawi al-Kabir (ènsiklopédhi fikih Syafi'i, 20 jilid)
• Al-Iqna (ringkesan saka Al-Hawi)
• Adab al-Qadhi
• A'lam al-Nubuwwah
• Adab ad-Dunya wa ad-Din
• Al-Ahkam as-Sulthaniyyah wa al-Wilayah ad-Dinniyyah (pulitik pamaréntahan)
• Nasihah al-Mulk
• Tashil an-Nadzar wa Ta'jil adz-Dzafar
• Qawanin al-Wazarah wa Siyasah al-Malik
• Fi an-Nahwu
• Al-Amtsal wa al-Hikam

Al-Mawardi tilar donya tanggal 30 Rabi'ul Awwal 450 H, kanthi yuswa 86 taun.^[4] Panjenengané disarèkaké ing makam Bab Harb ing Baghdad.^[4]

1. ↑ Meri, Josef W. Medieval Islamic Civilization: An Encyclopedia. Routledge encyclopedias of the Middle Ages. Psychology Press. kc. 486. ISBN 9780415966900.
2. ↑ Haddad, Gibril Fouad (2015). The Biographies of Elite Lives of the Scholars, Imams & Hadith Masters. Zulfiqar Ayub. kc. 200.
3. ↑ ^{a b c d e} Satori, Akhmad; Kurdi, Sulaiman (2016). Sketsa Pemikiran Politik Islam. Deepublish. kc. 77-83. ISBN 9786024014476.
4. ↑ ^{a b c} Iskandar, Salman (2007). 99 Tokoh Muslim Dunia for Kids. DAR! Mizan. kc. 143-144. ISBN 9789797526863.
5. ↑ Aziz, Abdul (2016). Chiefdom Madinah: Kerucut Kekuasaan pada Zaman Awal Islam. Pustaka Alvabet. kc. 123. ISBN 9786029193855.