Anthologie

En Anthologii oder Blüetelääsi (gr. ἀνθολογία anthología „Sammlig vo Blueme“, vgl. die latiinischi Leenübersetzig florilegium) isch e Sammlig vo usgweelte Text vo verschiidene Autore oder e themebezoogeni Zämmestellig vo literarische, musikalische oder grafische Wärk. E Sonderform vo dr Anthologii isch s Lääsibuech.

Dr Begriff anthología, wo im antike Griechische zerst emol ganz konkret „Sammle vo Blueme“ bezäichnet het, isch für d Lehrsatzsammlig Anthologiae vom griechische Astronoom Vettius Valens (2. Joorhundert n. Chr.) zum erste Mol as Ditel für e Sammelwärk brucht worde. Zämme mit dr Nääbeform ἀνθολόγιον (anthológion) und dr latiinische Leenbildig florilegium het mä dr Begriff über die büzantinischi Zit bzw. s latiinische Middelalter bis in d Nöizit brucht. Im 18. Joorhundert het er sich au in de Nazionaalsprooche allgemäin für Sammlige vo Lyrik, Aphorisme oder Erzäälige duregsetzt.