Biosfeer

Die biosfeer bestaan uit mense, diere en plante.

Mense het baie natuurlike vyande, waarvan mikroskopiese organismes wat mense siek maak en hul lewens eis, van die gevaarlikste is. Mikrobes soos bakterieë en virusse wat ons siek maak, kan gewoonlik deur medisyne genees en voorkom word. Soms, soos in die geval van MIV/vigs, is daar egter nie 'n geneesmiddel nie.

Epidemies en pandemies het in die verlede miljoene mense se lewens geëis en miljoene rande se skade veroorsaak, en dit gebeur selfs vandag nog.

Tussen 1348 en 1350 het die Swart Dood naastenby 25% van die Europese bevolking uitgewis. In 1665 het die Groot Pes van Londen duisende mense laat sterf.

Vandag is die plae van die verlede nie meer so 'n groot gevaar nie, as gevolg van inenting en beter mediese dienste. Soms kan so 'n plaag opnuut in sekere streke uitbreek, veral in die ontwikkelende lande. So byvoorbeeld het daar in Mei 1974 'n pokke-epidemie in ontwikkelende gebiede uitgebreek. 55 127 gevalle is aangeteken, maar 'n intensiewe inentingspoging deur die Wêreldgesondheidsorganisasie het dit vinnig onder beheer gebring.

Melaatsheid is 'n siekte wat in die Bybelse tyd algemeen voorgekom het. Dit is 'n siekte wat geassosieer word met swak gesondheid as gevolg van ondervoeding. Vandag kom hierdie siekte nog in onontwikkelde lande voor, en die mense wat dit opdoen word nie meer uit die gemeenskap verban nie.