Bommelerweerd

De Bommelerweerd (Riveerenlaand) is ne streke in et zuudwesten van de Nederlandsen previnsie Gelderlaand, eleagen tussen de rivieren de Waal in et noorden, den Maas in et oosten en zuuden, en den Ofgedamden Maas in et westen. Noar et zuuden ligt de previnsie Noord-Braobant, naor et noordoosten et Laand van Maas en Waal, naor et westen et Laand van Heusden en Altena (Noord-Braobant) en naor et noorden de Tielerweerd.

De Bommelerweerd is 147,6 km² groot en had 49.718 inwonners op 1 januari 2007. De Bommelerweerd is n riveereilaand, met (deur et water) nen umtrek van 66 km. Vanof 1 januari 1999 is de Bommelerweerd verdeald oaver de twee gemeenten Zaltbommel en Maasdriel.

De wonkarnen in de Bommelerwaeerd bunt: an den Waol, van west noar oost: Braokel, Solekem, Ni'jwaal, Gameren, Zaltbommel, Hurwenen en Rossum; an den (Ofgedamden) Maas, van oost noar west: Heereweerden, Alem, Karkdriel, Hoenzadriel, Hedel, Ammerzoden, Well, Wellsend, Nederhemert-Noord, Aalst en Poederoijen; in et binnenlaand: Brukkem, Karkwiek, Delwienen en Velddriel; op et eilaand van Nederhemert: Nederhemert-Zuud en Bern.

De Bommelerweerd is ne weerd verneumd noar Bommel, den lokoalen name veur Zaltbommel.

Doar bunt verskillenden kastelen in de Bommelerweerd: Slot Loevestein op de uterste westpunte, Kasteel Ammersoyen bi-j Ammerzoden, Huus van Malsen in Well, Kasteel Nederhemert (vanof 2005 wier n völleadig kasteel) in Nederhemert-Zuud en et Slot Rossum in Rossum. In Hedel bunt fundamenten bewaard ebleaven van et veurmoalige kasteel en langs den diek bi-j Solekem is an-egeaven woar eertieds et plaatseleke kasteel estoane hef.

Ni-js oaver de Bommelerweerd steet in et Braobants Dagblad en de waekblaadn 'Den Toorn' en 'Het Kontakt'. Howal de Bommelerweerd neet in de previnsie Noord-Braobant lig, verskient et Braobants Dagblad doar, umdat de streke ericht is op 's-Hertogenbosch.