Bratsche

Bratsche
ängl./ital.: viola
Klassifikation	Chordophon Striichinstrumänt
Donumfang
Doonbischbil	loose
Verwandti Instrumänt	Giige, Wiolondschello

D Bratsche oder Wiola isch e Striichinstrumänt, wo im Wääsentlige e gröösseri Bauform vo dr Giige isch. Si döönt diefer as d Giige und isch e chli anders proporzioniert. In dr Familie vo de Wioliine isch si s Alt-Instrumänt. S Wort Bratsche läitet sich vom italiänische Viola da braccio ab (vo doo chunnt dr Naame Armgiige). Mit däm wird d Haltig bim Spiile bezäichnet im Geegesatz zur Viola da gamba (Bäi-Wiola).

Vo dr Füsik us, si d Giige und d Bratsche seer äänlig. D Bratsche isch e chli gröösser und au dr Booge isch e chli lenger und schweerer. Wie d Giige het d Bratsche en A-, D-, und G-Saite. Aber wäärend d Giige e hoochi E-Saite het, wo si vom Klang us loot lo uusestoo, het d Bratsche e diefi C-Saite und döönt dorum dunkler und wäicher. Nid wie für d Giige, won e klassischs Soloinstrumänt isch, git s relativ wenig Wärk, wo für d Bratsche gschriibe si.