Buiteboordmotor

'n Buiteboordmotor is 'n motor wat aan die agterkant van 'n boot ('n watervaartuig) geheg word en dien om die boot aan te dryf. Die motor dien nie net as aandrywing nie, maar gewoonlik ook as die roer. Hiervoor word die motor aan 'n draaibare spil aan die boot "gehang". Die mees gebruikte tipe buiteboordmotor is die binnebrandenjin, in tweeslag- of vierslagformaat.

Daar bestaan ook elektriese motors wat baie omgewingsvriendelik en stil funksioneer. Hulle is egter slegs geskik vir klein bote wat korter afstande hoef te vaar, aangesien die geringe vermoë van sy lae kraglewering die gebruiksopsies beperk. Hulle is dus geskik vir 'n vissersbootjie of 'n fluisterboot in 'n natuurreservaat.