Centrocampista

Un centrocampista^[1] ye a persona que chuga a lo fútbol (u futbolista) en o centro d'o campo. Entre as suyas funcions se troban recuperar pilotas, propiciar a creyación de chugatas y espleitar o chuego ofensivo.

Os numeros tradicionals, encara que no unicos, ta ista posición son:

• O 5: o centrocampista esfensivo, u volant tapón. Ye o encargato de recuperar o balón y d'evitar a construcción d'o chuego ofensivo contrario. Representants famosos d'ista posición son Fernando Redondo, Josep Guardiola, Roy Keane o Emerson.
• O 8 y l'11: os volants por a dreita y a ezquierda, respectivament. S'encargan de transportar o balón dica o campo contrario y espleitar o chuego por as bandas. Bels eixemplos en son Pavel Nedved, Javier Zanetti, Denilson u David Beckham.
• O 10: O meya punta por o centro, u enganche, ye posiblement a posición mas famosa d'o fútbol. Aquí gosan chugar os mas habilidosos, ya que a suya función ye creyar o chuego, ordenar-lo y en muitas ocasions, d'a suya faina pende l'equipo. Por ista posición han pasato beluns d'os nombres mas importants d'iste esporte, como Diego Armando Maradona, Pelé, Roberto Baggio, Ronaldinho, Rivaldo, Zinedine Zidane, George Best u Bobby Charlton, entre muitos atros.

Encara que a tactica exprisata en o diagrama puet estar catalogata como basica, por estar un balanze entre chuego ofensivo y esfensivo, muitos entrenadors prefieren eliminar o enganche y aliniar dos "cincos", u trayer un chugador d'a esfensa y formar un 3-2-2-1-2. Atra famosa tactica estió a emplegata por a selección de Brasil en a Copa d'o Mundo 1970, a on que alinió un ofensivo 4-2-4.

1. ↑ (an) Diccionario aragonés-castellano-catalán. Versión preliminar. Estudio de Filología Aragonesa. Edacar num. 14. Zaragoza. Edicions Dichitals de l'Academia de l'Aragonés. ISSN 1988-8139. Octubre de 2024.