Comersee

Der Comer See (wie mer de Name z Dütschland schrybt) oder Comersee (wie mer en i de Schwiiz schrybt) isch e grosse Alperandsee uf der Südsyte vo den Alpe. Uf Iteliänisch heisst er Lago di Como und me seit em eifach au Lario, was vom antike römische Name Larius lacus chunt.

Der See lyt i der iteliänische Region Lombardei. Er het d Flechi vo 146 Kwadratkilometer und lyt im ene Tal und het drum e längi, schmali Form, wo im undere Deil in zwe Ärm ufdeilt isch. Vo obe bis unde isch er 51 Kilometer lang. Am tüfschte Punkt vom See isch der Seebode 425 Meter wyt under der Oberflechi. Wil die aber nume uf 199 Meter über em Meeresspiegel lyt, chunt das Tal also wyt under d Meeresoberflechi abe. Das töife Becki het der Addagletscher i de Yschzyte usgrabe.

Der Comersee lyt ganz z Italie, so wie au der Gardasee wyter im Oschte, aber andersch weder der Luganersee und der Langesee im Weschte, wo deils i der Schwiiz und deils uf iteliänischem Bode liged.

Ganz oben am See münde d Adda, wo us em Vältlin chunt, und d Mera, wo am Malojapass afoot und dur s Bergell abelauft, in Comersee. Ihri Mündige sind zwe Kilometer wyt usenand. D Oberlöif vo de Flüss liged i der iteliänische Provinz Sondrio, ganz churz vor em See chöme si aber i d Provinz Como, wo der See derzue ghört.

Chlyneri Zueflüss sind der Liro, der Albano und der Telo, wo vo der Bärgchetti weschtlech vom See abelauf, d Breggia, wo vom schwiizerische Chiasso us bi Cernobbio an See abechunt, und uf der Oschtsyte vom See sin dr Varrone un d Pioverna.

Im undere Deil isch der See i zwöi längi Seebecki ufdeilt, das vo der Stadt Como (wo uf Dütsch Chum heisst) und das vo der Stadt Lecco. Bi dere Stadt flüsst s Wasser mit em Fluss Adda us em Comersee use, und dä Fluss chunt churz drufabe dure See Lago di Garlate und denn öschtlech vo Mailand dure und mündet i der Nöchi vo Cremona in Po.

Grösseri Ortschafte rund um e See sind au Colico, Dongo, Gravedona, Menaggio, Bellagio, Cernobbio und Bellano. Bi Cernobbio isch d Landesgränze vo der Schwiiz nume drü Kilometer wyt vom See wäg.