Consulat

S Konsulat (latiinisch consulatus), s Amt vom ene Konsul (latiinisch consul ^[1]), isch s höggste zivile und milidäärische Amt vo dr Ämterlaufbaan (cursus honorum) in dr Römische Republik gsii. Es het bis in d Spootantike existiert, het aber, wo d Kaiserzit aagfange het, e groosse Däil vo sinere politische Bedütig und Macht verloore.

Jeedes Joor het s römische Volk zwäi Konsul gweelt. Sit 153 vor dr Zitwändi häi si iir Amt am 1. Jänneraadräte, und dä gältet sit denn as Jooresaafang, wil d Konsul die eponyme (griechisch: „wo dr Naame git“) Beamte vo Rom gsi si, wo d Joor noch ene benennt worde si. Für d Jooresaagoob het mä d Nääme vo de bäide Konsul im Ablativ hinderenander aagee, z. B. wemm mä bim ene Eräignis Cn. Domitio C. Sosio consulibus drzue schribt, bedütet das, ass es im Joor 32 vor dr Zitwändi bassiert isch, wo dr Gnaeus Domitius und dr Gaius Sosius Konsul gsi si. En ehemoolige Konsul (consularis bzw. Konsular) het immer e bsundrigs Aasehä gnosse und und het zur senatorische Elite ghöört.

1. ↑ Altlatiinischi Forme: cosol oder consol. D Etümologii isch nit ganz klaar, vermuetlig läitet sich s Wort vo conso „befrooge“ ab, vo däm isch au consulo „beroote“ abgläitet.