Country-Musik

Gschicht vo dr Country-Muusig
1922	Ersti Schallblattenufnaam
Nov. 1925	D Grand Ole Opry Show wird zum erste Mol gsändet
Aug. 1927	D Carter Family und dr Jimmie Rodgers, die erste groosse Stars, wärde entdeckt
1929	Die erste Singing Cowboys im Film dräten uf
um 1934	Dr Bob Wills nimmt dr erst Western Swing Ditel uf
um 1935	In Texas entstuut dr Honky Tonk
1940	Dr Bill Monroe entwicklet dr Bluegrass
Juni 1949	Dr Hank Williams singt zum erste Mol in dr Grand Ole Opry
1953	In Memphis, Tennessee, entstoot dr Rockabilly
um 1955	Dr Nashville Sound isch d Antwort uf e Rock ’n’ Roll
um 1968	Vo Kalifornie us entwicklet sich dr Country-Rock
ab 1970	D Outlaw-Beweegig dominiert
ab 1980	Urban Cowboy – D Country-Muusig chunnt dr Popmuusig nööcher
ab 1985	D Neo-Dradizionaliste läite e Geegebewegig ii
ab 1990	Mit New Country chunnt mä uf hoochi Verchaufszaale und dr Alternative Country verbindet s Lääbensgfüül von ere Generazion, wo vom Punk brägt isch, mit Country-Dradizioone

D Country-Musik [ˈkʌntri] isch e Muusigrichdig, wo us de USA stammt. Si isch am Aafang vom 20. Joorhundert us dradizionelle Elimänt vo dr Volksmuusig vo de öiropäische Zuewanderervölker entstande – bsundrigs us Irland und Ängland. D Old-Time Music, wo ursprünglig in de südlige Appalatsche dehäi gsi isch, het sich dur urbani Iiflüss und Übernaam vo Elimänt vo andere Muusig-Schaner – wie öbbe em Blues – zur hütige Country-Muusig entwigglet.

Dr Begriff Country & Western bezieigswiis C&W, wo vilmol as Sünonüüm brucht wirde, isch falsch, wil er suggeriert, ass es sich um en äihäitligs Schaner wurd handle. Country & Western goot zrugg uf e Tschart-Bezäichnig, wo s amerikanische Billboard-Magazine in de 1940er-Joor für Ditel us de Schaner Country-Muusig und Western-Muusig brucht het.

D Gschicht vo dr Country-Muusig isch dur drei Beweegige brägt, wo sich überschniide:

D Dradizionaliste wo zu de Ursprüng vo de teggstlige und musikalische Theme zrugg wottn.
D Ernöierer experimentiere mit nöije Stilvariante, Usdrucksforme und Instrumänt.
Die Kommerzorientierte sueche d Nööchi zur Popmuusig, zum e mögligst groosses Publikum aazspräche.

E tüpischs Merkmol vo dr Countrymuusig si diräkti Teggst, wo sich vilmol uf die amerikanische Lääbensverheltniss bezien, persönligi Erfaarige beschriibe, aktuelli Eräigniss kommentiere und nit sälte au humorvoll sin.

Bim dradizionelle Country wärde hauptsächlig Saiteninstrumänt wie Gitarre, Banjo, Mandoline, Kontrabass oder Fiddle (en äifachi Giige) verwändet, aber au Akkordeon, Klavier oder Schnuuregiige. Im zitgenössische Country chömme Schlaagzüüg und Elektrogitarre und -Bass drzue, was vo dr Instrumentierig vo dr Rockmuusig abgluegt isch.