Energiewirtschaft

Dr Begriff Energiiwirtschaft umschribt alli Iirichdige und Handlige vo Lüt und Instituzioone, wo d Hushält und alli Arte vo Bedriib mit Energiidrääger wie Stadtgaas, Ärdgaas, flüssigi Chraftstoff, elektrischi Energii oder feste Energiidrääger wie Choole, Koks, Torf und Holz versorge.

Er umfasst u. a. d Themeberiich Energiikwelle, Energiigwünnig, Energiispiicherig, Energiiüberdräägig, Energiihandel, Verdriib und Abrächnig vo Energi, und d Versorgigssicherhäit.

D Drääger vo dr Energiiwirtschaft si vor allem die sogenannte 'Energiiversorgigsundernääme' (EVU); das si mäistens Undernääme, wo elektrischi Energii erzügt und/oder über s öffentlige Stromnetz verdäilt und/oder sine Abnäämer Ärdgaas und/oder Färnwermi liiferet. Im witere Sinn cha mä au d Ärdölindustrii und d Chooleförderer bzw. d Chooleimportöör und d Brennstoffhändler zur Energiiwirtschaft zele.