Febrero

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Febrero u febrer^[1] ye o segundo mes de l'anyo en o calandario gregoriano, y tien 28 días, encara que en os ditos anyos bisiestos en tien 29.

O suyo nombre en latín, februarius^[2], fa referencia a que yera un mes adedicato a las februa, unas fiestas de purificación a on se feban sacrificios a los muertos; d'o nombre d'ixas fiestas en deriva o nombre d'o dios Februus d'a mitolochía romana, dios que yera tamién relacionato con ixas actividaz purificativas. Mesmo que o mes de chinero, o mes de febrero no existiba en o primitivo calandario romano, y l'adhibiron, seguntes se diz, cuan en o sieglo VIII aC o rei Numa Pompilio fació a suya reforma d'o calandario, transformando-lo d'un calandario de base lunar en un calandario de base solar.

En ixas envueltas teneba ya 28 días, pero cuan Chulio César establió o dito calandario chuliano, pasó a tener-ne 29 (y 30 en os anyos bisiestos), estando tamién o zaguer mes de l'anyo, que en ixas envueltas prencipiaba en marzo.

En a reforma que fació César Augusto d'o calandario chuliano o mes de febrero perdió un día, pasando asinas a tener a suya configuración actual.

1. ↑ (an) Diccionario aragonés-castellano-catalán. Versión preliminar. Estudio de Filología Aragonesa. Edacar num. 14. Zaragoza. Edicions Dichitals de l'Academia de l'Aragonés. ISSN 1988-8139. Octubre de 2024.
2. ↑ (es) Francho Nagore Laín: Vocabulario de la Crónica de San Juan de la Peña (versión aragonesa, s. XIV), Universidat de Zaragoza, 2021, ISBN 978-84-1340-315-1, p.239