Gegharkunik

Un o daleithiau (marz) Armenia yw Gegharkunik (Armeneg: Գեղարքունիք). Fe'i lleolir yn nwyrain canolbarth y wlad, am y ffin ag Aserbaijan. Gyda arwynebedd o 5,348 km², Gegharkunik yw'r dalaith fwyaf yn Armenia o ran maint. Mae 1,278 km² o'i harwynebedd yn cael ei gymryd gan Llyn Sevan, y llyn dŵr croyw mwyaf yn ardal y Cawcasws. Gavar yw prifddinas y dalaith. Poblogaeth: 240,100 (7.4% o boblogaeth Armenia).

Mae Gegharkunik yn dalaith fynyddig sy'n cynnwys yn ei ffiniau mynydd Ajdahak (3598 m). Rhed y briffordd genedlaethol Yerevan-Sevan-Dilijan trwy'r dalaith. Ceir sawl parc a gwarchodfa natur yno, yn cynnwys Parc Cenedlaethol Sevan, sy'n denu nifer o dwristiaid.

Mae'r gaeafau yn oer gydag eira ar y mynyddoedd, ond mae'r hafau yn gymhedrol ac yn tueddu i fod yn gymylog.