Groot-Soenda-eilande

Groot-Soenda-eilande Inheemse naam: Kepulauan Sunda Besar
Ligging van die Groot-Soenda-eilande
Geografie
Ligging	Suidoos-Asië
Koördinate	0°00′S 110°00′O / -0.000°N 110.000°O / -0.000; 110.000
Argipel	Soenda-eilande
Totale eilande	4
Hoofeilande	Borneo, Java, Soelawesi, Soematra
Oppervlakte	1 448 586 vk km
Hoogste punt	Berg Kinabalu 4 095 m
Administrasie
Broenei
Hoofstad	Bandar Seri Begawan
Grootste stad	Bandar Seri Begawan (50 000)
Indonesië
Hoofstad	Djakarta
Grootste stad	Djakarta (9 607 787)
Maleisië
Hoofstad	Kuala Lumpur
grootste stad	Kuala Lumpur (1 768 000)
Demografie
Bevolking	240 miljoen
Bevolkingsgroepe	Hakka, Han-Chinese, Javane, Maleiers, Soendanese, Tamils

Die Groot-Soenda-eilande (Indonesies en Maleis: Kepulauan Sunda Besar) is 'n argipel van vier groot eilande binne die Maleise argipel langs die ewenaar wat saam met die Klein-Soenda-eilande die Soenda-eilande vorm. Die vier eilande is Borneo, Java, Soelawesi en Soematra, wat tot die grootste eilande ter wêreld behoort en deur 'n tropiese klimaat gekenmerk word. Die vier eilande is geleë tussen die Maleise Skiereiland in die noordweste, die Filippyne in die noorde, die Molukke in die ooste en die Klein Soenda-eilande in die suidooste. Die grootste van die Groot-Soenda-eilande is Borneo met 'n oppervlakte van 743 330 km², terwyl Java met 'n bevolking van 145 miljoen die mees bevolkte is. Java word ook as belangrikste van die vier Soenda-eilande beskou, aangesien hier die Indonesiese hoofstad Djakarta en ander groot stede lê.

Die Groot-Soenda-eilande word begrens deur die oop Indiese Oseaan in die suide en weste, die Suid-Chinese See in die noorde, die Sulu- en Celebesseë in die noordooste, die Molukkesee en Bandaseë in die ooste, asook die Flores- en Baliseë in die suidooste. Die Javasee is die belangrikste see binne-in die argipel.

Die grootste deel van die Groot-Soenda-eilande word deur die eilandnasie Indonesië beslaan. Die grootste deel van Borneo se kus langs die Suid-Chinese See vorm die oostelike deel van Maleisië met die klein eksklawe Broenei tussenin, terwyl die oorblywende deel van dié eiland aan Indonesië behoort. Aan die suidoostelike einde van die Straat van Malakka is die stadstaat Singapoer geleë.

Die Groot-Soenda-eilande het 'n bevolking van sowat 240 miljoen. Op die eilande word veral Maleis-Polinesiese tale gepraat, maar daar is ook 'n aansienlike Han-Chinese bevolking wat Chinees besig en die Tamils in Singapoer wat Tamil praat. Die belangrikste godsdiens is Islam wat in die drie lande Broenei, Indonesië en Maleisië die dominerende geloof is.

Borneo en Soematra is veral bekend vir hul reënwoude wat die enigste habitat van die Orangoetang vorm. As gevolg van sterk ontbossing word hierdie groot ape ernstig bedreig. Die Javaanse tier is reeds uitgestorwe en die Javaanse renoster word ernstig bedreig.