Highgate-begraafplaas

Die Highgate-begraafplaas is 'n vredehof in Highgate, 'n stadsdeel in die noorde van die Britse hoofstad Londen wat op 20 Mei 1839 ingewy is. Dit was een van sewe nuwe privaat begraafplase wat in die 1830's en 1840's in die omliggende landelike omgewing vir die teraardebestelling van Londenaars ontstaan het nadat kerkhowe in die stadsgebied oorvol geraak het. Na hierdie sewe begraafplase word informeel dikwels as die Magnificent Seven verwys.

Na Highgate Cemetery word dikwels verwys as die mooiste van hierdie Victoriaanse begraafplase. In die Victoriaanse tydperk was dit ook die gewildste - hoe meer bekende kunstenaars, skrywers en intellektueles hier ter ruste gelê is, hoe meer het dit die gunsteling-begraafplaas van welvarende gesinne geword.

Sowat 170 000 oorledenes het hul laaste rusplek in 'n geskatte 53 000 grafte op die Highgate-begraafplaas gevind, waaronder bekende persoonlikhede soos Karl Marx. In die 1970's is die begraafplaas byna aan verval prysgegee nadat geen plek meer beskikbaar was vir nuwe teraardebestellings nie en die privaat eienaars dit nie meer winsgewend kon bedryf nie. Plantegroei is nie meer beheer nie, en vandale het verwoesting gesaai.

In 1975 het belangstellende vrywilligers in 'n vereniging, The Friends of Highgate Cemetery, saamgesluit om die begraafplaas van algehele verwaarlosing te red. Tans het die vredehof, wat in 'n westelike en oostelike afdeling verdeel word, de facto die status van 'n natuurreservaat en word dit in die National Register of Historic Parks and Gardens gelys. Die westelike afdeling, met argitektoniese besonderhede soos die Egiptiese Laan (Egyptian Avenue), die Circle of Lebanon, die Terrace Catacombs en Julius Beer se mausoleum, staan nie oop vir individuele besoekers nie, maar mag tydens begeleide toere besigtig word.