Histologie

D Histologii (vo altgriechisch ἱστός histos, dytsch Gwääb und logii, gr. λόγος logos ‚Lerr‘) oder Gwääbleer isch d Wüsseschaft vo de biologische Gwääb. Si isch d Leer vo wie sich pflanzligi und dierischi Gwääb bilde und was für Strukture si häi und iiri spezifische Funkzioone ^[1] und isch ä Däilgebiet vo dr Medizin und vo dr Biologii. Im witere Sinn bezeichnet Histologii die mikroskopischi Anatomii. D Histopathologii isch d Wüsseschaft vo de chrankhafte Veränderige vo Gwääb.

In dr Histologii wärde Gwääbbroobe undersuecht. Für daas schniidet mä Gwääb in mikrometerdünni Schiibli, färbt die ii und luegt sä under eme Liechtmikroskooop aa. Die elektronenmikroskopischi Undersuechig vo wääsentlig dünnere Schiibli (0,01–0,5 µm) macht mä vor allem im Beriich vo dr Forschig.

In dr Medizin hilft d Histologii bi dr Früediagnoose vo Tumoor (z. B. Maagebiopsii), bi dr Klassifizierig vo Tumoor (guetartig/bösartig), bi Stoffwäggselchrankhäite und parasitäre bakterielle, entzündlige Chrankhäite, zum die best Therapii z finde und ä Hufe anders. Mä reedet von ere morphologische Diagnostik, wil si z Stand chunnt dank em Erschiinigsbild und em färberische Verhalte vo de Gwääbstrukture.

1. ↑ Rainer Brömer: Histologie. In: Werner E. Gerabek, Bernhard D. Haage, Gundolf Keil, Wolfgang Wegner (Hrsg.): Enzyklopädie Medizingeschichte. De Gruyter, Berlin/Nöi York 2005, ISBN 3-11-015714-4, S. 605 f.