Historienmalerei

D Historiemoolerei isch e Kunstgattig, wo iiri Ursprüng in dr Epoche vo dr Rönessans het. Dr Gattigsnaame Historie oder Historiemoolerei leitet sich etümologisch us em Wort historia oder au istoria ab. In dr Historiemoolerei wärde historischi, aber au religiöösi, mythisch-saagehafti oder au lidderarischi Stoff dargstellt, wo uf en äinzige, ahistorische Momänt verdichtet si. Vilmol stoot e Held im Middelpunkt, e groossi Äinzelpersöönlikäit, wo zäigt wird, wie si autonom handlet. Historiebilder si käini realistische Darstellige vo historische Eräigniss, sondern die wärde mit voller Absicht verkläärt und zum Gschichtsmüthos überhööt. Dorum si s vilmol Herrscher, wo dr Ufdraag für sä geen, si chaufe oder usstelle.