Hormon

D Hormon (griech. ὁρμάω, hormáō „adriibe“) si biochemischi Botestoff.

D Hormon übermittle innerhalb vom ene Läbewäse Informatione vo eim Organ zum andere oder von eim Gwäb zum andere. Ähnligs mache au d Närve, nume bruuche die Elektrizitet, währed d Hormon chemikalischi Stoff si. Im Vergliich düen d Närve Informatione sehr vil schnäller vermittle, der hormonal Informationsfluss isch relativ langsam. Dodrbii si d Ziitrüüm vo der Hormonusschüttig bis zur Hormonwirkig je noch Hormon sehr underschiidlig, e baar Hormon wirke sehr schnäll (z. B. s Adrenalin), währed d Wirkig vo andere Hormon wie z. B. de Steroidhormon erst noch Stunde iisetzt.

Hormon bi Dier wärde dur s Bluet oder bi Insekte, Chräbs oder Schnägge mit der vergliichbare Hämolymphe zu ihre Ziilorgan dransportiert. Das isch s Wäse vo der endokrine Wirkig. Gwäbshormon, wo im gliiche Organ bildet wärde und wirke, si drgege parakrini Stimulatore.