Kasualitate

Kasualitatea, kointzidentzia hutsa ere deitua, gertaera zenbaitek dituzten zirkunstantzia eta ezaugarri komunen multzoa da, zoriz gertatzeko ustez duten probabilitate txikiagatik edo printzipioz duten lotura eskasagatik, behatzaileengan harridura sorrarazten dutenak. Zerbait kasualitatez gertatu denean, bereziki gertaera garrantzitsuen kasuan, patua aipatzen da horiek gertatzeko arrazoi moduan, modu irrazionalez. Kasualitatezkoak irizten diren gertaerak denetarikoak izan daitezke, hala nola, elkar ezagutu berri duten bi pertsonen urtebetetze egun edo abizen berdina, hiri handi batean norberak galdutako giltzak kalean ezagun batek aurkitzea nahiz eguraldi oneko bolada baten ondoren, ospakizun egun batean eguraldi txarra suertatzea. Maiz, intuizioz izandako gertaerak gauzatu eta kointziditzea kasualitate handia dela pentsatzen bada ere, probabilitate legeen arabera ez dira hain harrigarriak; adibidez, bi pertsonak gutxienez urtebetetze egun bera izateko probabilitatea %50a baino handiagoa izateko zenbat pertsona behar diren hurbiltzean, pertsona arruntek kopuru handiak aipatzen dituzte, matematikoki pertsona kopuru hori 23 da, askok uzte dutena baino txikiagoa.