Klarissen

Dr Zwäit Orde vom häilige Franziskus, dr Orde vo de Clarisse (mä säit em au dr Seraphisch Orde, latiin. Ordo Sanctae Clarae, Abchürzig OSC), isch 1212 vom Franziskus vo Assisi und dr Klara vo Assisi (1193–1253) gründet worde. Si si zerst as d Damianitinne, «die arme Fraue bi San Damiano», bekannt gsi. Dr Name vo de Clarisse häi si erst noch em Dood vo dr Clara vo Assisi überchoo.

Dr Franziskus het em Orde d Reegle vorgschriibe: strängi Klausur und vollkommeni Armuet. S Bischbil vo de Damianitinne het Schuel gmacht und bald si nöiji Klööster vo de Minorite und Clarisse gründet worde. Das het spööter zur Gründig vom ene dritte Orde gfüert, wo immer e Manneorde und e Frauenorde zämmeghööre und e Ordensfamilie bilde.

Wo d Clara vo Assisi gstorbe isch, het s scho 111 Damianitinne-Klööster gee: 68 z Italie, 21 z Spanie, 14 z Frankriich und 8 im Häilige Römische Riich. Gege s Ändi vom 14. Joorhundert si s scho mee as vierhundert in ganz Öiropa gsi. Hüte existiere uf dr ganze Wält öbbe 1'000 Clarisseklööster, z Dütschland öbbe zwanzig und in dr Schwiz no zwei.^[1][2]

1. ↑ Klarissen uf: Orden online
2. ↑ Klaras Schwestern in der Schweiz Artikel uf tauteam.ch vom September 2013