Krank-saoz

Krank-saoz
Rummatadur filogenetek
Riezad :	Animalia
Skourrad :	Arthropoda
Kevrennad :	Malacostraca
Urzhad :	Decapoda
Kerentiad :	Cancridae
Genad :	Cancer
Anv skiantel
Cancer pagurus Linnaeus, 1758
D'ar vevoniezh e tenn ar pennad-mañ.

Ar c'hranked-saoz, a vez graet kouskered pe kranked gwenn diouto ivez, o anv spesad Cancer pagurus, a zo kresteneged hag a vez kavet er Meurvor Atlantel, er Mor Kreizdouar hag e Mor an Hanternoz. Ur grogenn ruz-gell hag hirgelc'hiek o deus, ha du eo penn o meudoù hag o favioù. Ur wezh erru en o oad gour e c'hall o c'hrogenn tizhout betek 25 cm hag e c'hallont pouezañ betek 3 kg. Gouest int da vevañ betek 20 vloaz met hiniennoù hepken a ya betek an oad-se abalamour d'ar peskerezh stank a vez graet anezhe.

Paot eo ar c'hranked-saoz e gevred ar Meurvor Atlantel betek Norvegia en hanternoz ha Norzhafrika er c'hreisteiz, war ar sont gant pezhioù maen gros, traezh ha lec'hid, eus glann ar mor betek 100 m pe war-dro. Kavet e vezont alies en toulloù hag er faoutoù er c'herreg met en toleadoù digor-frank ivez a-wezhioù. Kranked bihanoc'h a c'haller kavout dindan ar vein en aod.