Mellophon

Dä Artikel beschriibt s Blõsinschtrumènt Mellophon odder Melophon. Für s Handzuginschtrumènt luèg Melophon.

S Mellophon odder Melophon, au Mellophonium dauft, isch è Blèchblõsinschtrumènt un ghört zuè dè Hornfamilliè.

S wörd vo allem i dè Milidärorcheschter, Marching Bands un söttigèm gschpillt, wo i dè USA è großi Tradition hèn. Dört setzt mò in Marschformationè s Mellophon statt èm Waldhorn y, well s bim Gõ eifacher z händlè isch un dè Schallbecher nõch fürrè gòt, sèbb isch uss klanglicher, abber au choreographischer Sicht vo Bedütig. S Mellophon vohaaltet sich also ähnlich in Relation zum Althorn wiè s Sousaphon im Voglych zuè nèrè Tuba.

Im Mellophon sin Donumfang langèd vom fis bis zum c². Gwöänlich sin Mellophöner in irer Grundschtimmig in F odder Es gschtimmt, analog zum Althorn. D Obberdonreiè lyt è Oktavè übber m F-Waldhorn, wa braktisch bedütet, dass dè übliche Donberych i dè notyrtè eingschrichenè Oktavè grifftechnisch wiè bi dè Drumbeetè ghandhabt würd, d Naturdön dört also wit usènand ligèd. Sell isch bim F-Waldhorn nit èso, dört spillt üblicherwys è Oktavè obbèdra, also quasi i dè zweigschrichène Oktavè, wo d Obberdonreiè im Terzabschtand stòt, ergo dütlich enger isch (Naturdön: c²,e²,g² usw.) S Mellphon tendyrt also im Gegèsatz zum F-Waldhorn nit zum Giigsè, zuè falsch aagschpilltè Naturdön. S Mellophon hèt drei Ventyl, wiè auch d Drumbeetè, s hèt nit kei Quartventyl, well mò sell nu für de düèfè Donberych bruucht, wo s hoche Blèch nit deheim isch. Für s Mellophon wörd meischtens è Kesselmundstüggle - bauglych mit sellèm vom Althorn odder vo dè Drumbeetè - bruucht, well s jo au als Althorn-Ersatz vowendet wörd. Alternatyv cha mò au è Waldhornmundschtüggle bruuchè, i sellèm Fall bruucht s einèwäg è passendè Adapter, well dè Mundschtuggschaft vum Waldhorn dütlich ènger isch.