Mennisten (Plautdietsch Menniste(n), Pennsylvaniadüütsch Mennischte) sünd ethnische Mennoniten. Dat heet Lüüd, de nich bloots von de Religioon her Mennoniten sünd, man ook na Spraak un Kultuur en egen Grupp sünd, de sik von de Lüüd verscheelt, mank de se leevt.
Von de Spraak snackt de meersten Mennisten Plautdietsch oder Pennsylvaniadüütsch. Von de Kultur her leevt en groten Deel von de Mennisten in Kolonien, de von Bueree präägt sünd. Mank de Mennisten givt dat verscheden Ünnergruppen, de sik in jemeer Levensstil ünnerscheedt. Welk bruukt keen moderne Technologie, wieldes dat ok annere Gruppen giv, de nix gegen Technologie hebbt. Annere Mennisten, to’n Bispeel de, de na Düütschland gaan sünd, hebbt düssen Levensstil aver nich mehr.