Padrenuesu

El padrenuesu^[1] o panuesu^[2] (del llatín Pater Noster) ye'l nome d'una oración cristiana que, acordies colo que cuenten los evanxelios de Matéu (Mt 6:9-13) y Lluques (Lu 11:1-4) diera a conocer Xesús de Nazaré a los sos discípulos. Les diferencies qu'apaecen anguaño nes versiones d'esta oración nes diferentes confesiones cristianes derívense de les distintes interpretaciones de la descripción de les circunstancies na que la oración foi dicha por Xesús y del distintu estilu lliterariu de los dos evanxelistes citaos.

El Padre nuesu ye, pa les confesiones mayoritaries del cristianismu, la oración más principal de toes. La Ilesia Católica considéralu un resume de la doctrina cristiana; los protestantes tómenlu como'l modelu d'oración cristiana; y, pa los ortodoxos, ye la oración más perfecha de toes.

1. ↑ Esti términu apaez nel Diccionariu de l'Academia de la Llingua Asturiana. Ver: padrenuesu
2. ↑ Esti términu apaez nel Diccionariu de l'Academia de la Llingua Asturiana. Ver: panuesu