Parsen

D Parse (persisch Pars „Perser“) si en ethnisch-religiösi Grubbe, wo ursprünglig us Persie, em hütige Iran, stammt. Si folgt dr Leer vom Zoroastrismus und schliesst sich gege anderi Religione sträng ab. Die mäiste Parse git s in Indie und in Pakistan. Si underschäide sich sproochlig, kulturell und gsellschaftlig vo dr Irani-Grubbe, wo dört aasäässig isch und ebefalls vo Persie stammt und zoroastrisch isch. Die iranische Aahänger vom Gott Ahura Mazda bezäichne sich as Zoroastrier.

Im ene Ardikel vo 2003 in dr Wiener Zeitung git s uf dr ganze Wält öbbe 200'000 Parse.^[1] Noch ere Volkszelig häi im Joor 2001 z Indie, vor allem z Mumbai, öbbe 70'000 Parse gläbt. Si si e wältoffnigi, gebildeti und woolhabendi Gmäinschaft wo für iiri karitativi Däätikäit gschetzt wird. Wil die indische Parse wenig Chinder häi, und mä nume as Pars cha uf d Wält choo und nid cha konwertiere, sinkt iiri Zaal immer mee.

1. ↑ Eleonore Chowdhury-Haberl: Zarathustras Erben. Die Parsen von Bombay bleiben ihrer altpersischen Religion treu. Archiviert vom Original am 7. Februar 2006; abgruefen am 17. Oktober 2015. ; in Wiener Zeitung, Usgoob vom 7. Novämber 2003.