Pazifikspiele

D Pazifikspiil (ängl.: Pacific Games, bis 2007 South Pacific Games) sin Sportwettkampfveraastaltige, wu regelmäßig im sidpazifische Ruum stattfinde. Si sin uf Vorschlag vum fidschianische Bolitiker Sahu Khan yygfiert un zum erschte Mol anne 1963 z Suva (Fidschi) uusdrait wore.

E große Aadail am Erfolg vu dr Spiil het dr erscht Director of Organisation, F.J. Coyne, ghaa.

D Pacific Games wäre vum Pacific Games Council organisiert, wu sich zämmesetzt us em Exekutiv-Komitee, dr Fachuusschiss un dr nationale fir d Pacific Games zueständige Sportverbänd, wu in dr Pacific Games Association organisiertsin, zmaischt di Nationale Olympische Komitee, zem Dail aber au Sonderverbänd fir di pazifische Spiil, wu s, wie z Mikronesie, kai aigeni NOK git.

Dr Ablauf isch seli stark an dää vu dr Olympische Spiil aaglähnt (Ereffnigszeremony, Fahne, Yyzug vu dr Athlete...)

D Merewai Turukawa Vesikula, e Chugelstoßeri vu Fidschi, isch di erscht Gwinneri vun ere Goldmedallie bi dr South Pacific Games gsi. In insgsamt 60 Entschaidige het Fidschi 34 mol Gold gwunne. Anne 2007 het s Fueßballturnier vu dr South Pacific Games as erschti Rundi vum OFC Nation Cup 2008 dient.

Di letschte South Pacific Games hän anne 2007 uf Samoa stattgfunde. No dr Abschlussveraastaltig am 8. Septämber 2007 isch dr Name vu dr Spiil gänderet in Pacific Games.^[1] Die negschte Pacific Games wären anne 2015 z Port Moresby, Papua-Neiginea veraastaltet. Dodermit soll dr 40. Johresdag vu dr Unabhängigkait vu Papua-Neiginea gwirdigt wäre.^[2]

1. ↑ South Pacific Games Blog. Google Cache, archiviert vom Original am 8. Oktober 2007; abgruefen am 3. Mai 2009. 
2. ↑ Upcoming Games. sportingpulse.com, abgruefen am 24. Januar 2012.