Proefbalans

Hierdie artikel bevat nie ’n bronnelys nie, wat beteken dat die inhoud nie geverifieer kan word nie. Enige bevraagtekende inligting mag dus ook mettertyd verwyder word. Help Wikipedia deur betroubare bronne tot die artikel by te voeg.

'n Proefbalans is 'n lys van al die nominale grootboekrekeninge (algemene grootboek) soos dit vervat is in die grootboek van 'n besigheid. Hierdie lys bevat die naam van die nominale grootboekrekening en die waarde van die rekening. Die waarde van die rekeninge sal óf 'n debietsaldo óf 'n kredietsaldo bevat. Die debietsaldowaardes sal in die debietkolom van die proefbalans vertoon word en die kredietsaldowaardes sal in die kredietkolom vertoon word. Die inkomstestaat en die staat van finansiële posisie (voorheen balansstaat) sowel as ander finansiële verslae kan dan vervaardig word met behulp van die grootboekrekeninge gelys op die proefbalans. Alle proefbalanse moet balanseer, vandaar die naam proefbalans.

Die naam is afkomstig van die doel van 'n proefbalans. Dit is om te bewys dat die totale waarde van al die kredietsaldobalanse gelyk is aan die totale waarde van al die debietsaldobalanse. Dié aanbieding van elke nominale grootboekrekeningbalans waarborg 'n akkurate verslag van die nominale grootboeke vir gebruik in die finansiële verslae van maatskappye (en ander entiteite) se prestasie. Indien die totaal van die debietkolom nie gelyk is aan die totale waarde van die kredietkolom nie, sou dit blyk dat daar 'n fout in die nominale grootboekrekeninge is. Hierdie fout moet dan opgespoor en reg gestel word voordat 'n inkomstestaat of staat van finansiële posisie geproduseer kan word.

Die proefbalans word gewoonlik voorberei deur 'n boekhouer of rekenmeester wat gebruik maak van boeke of rekenaar programmatuur om rekord te hou van finansiële transaksies en dit dan te pos in die nominale grootboeke en persoonlike grootboekrekeninge. Die proefbalans is 'n deel van die dubbelinskrywingstelsel en maak gebruik van die klassieke T-rekeningformaat vir die aanbieding van waardes.

Hierdie artikel is ’n saadjie. Voel vry om Wikipedia te help deur dit uit te brei.