Romanik

Dä Artikel behandled dr romanisch Stiil. Witeri Bedütige vo romanisch findt me do.

Dr Begriff Romanik (au: romanische/vorgotische Stil) beschribt die kunstgschichtligi Epoche in dr öiropäische middelalterlige Kunst zwüsche dr Vorromanik und dr Gotik, wo druf choo isch, in dr Moolerei, dr Blastik und dr Archidektuur. Die romanischi Archidektuur foot öbbe um s Joor 1000 aa und drättet in ganz Öiropa uf. Si wird in Frankriich öbbe vo de 1130er Joor vo dr Gotik abglööst, nördlig vo de Alpe und in Spanie und Italie aber erst im Lauf vom 13. Joorhundert. De regionale Usbräägige vo dr italiänische Romanik säit mä mänggisch au Brotorönessans. Über d Normandii si im 11. Joorhundert romanischi Bauforme as Norman Style uf die Britische Insle choo und häi dört die vorromanischi Angelsäggsischi Archidektuur abglööst. Sit em Ändi vo dr Antike im 5. Joorhundert, wo Rom undergange isch, gältet d Romanik as die ersti groossi öiropäischi Kunstepoche. „Tüpischi“ Merkmol vo romanische Baute si Rundbööge, Rundboogefänster, Süüle mit blockartige Kapitell und Wänd mit bedoont wuchtige Stäimasse.