Sedetans

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Sedetans  (†) Sedetani
Periodo
Sieglo III aC
Rechions actuals
Val meya d'Ebro, con aria centrata en o Baixo Martín, Andorra-Sierra d'Arcos, Campo de Belchit, Ribera Baixa d'Ebro (Aragón)
Idiomas
Ibero
Pueblos relacionaus
Atros pueblos ibers, edetans
Mapa
Aria de distribución d'os sedetans

Os sedetans estioron un pueblo de cultura iberica d'o sieglo III aC que viviban en a val meya d'Ebro, con aria centrada en o Baixo Martín, Andorra-Sierra d'Arcos, Campo de Belchit, Ribera Baixa d'Ebro y arredols mas que mas a lo sud d'Ebro.

Prenen o suyo nombre como muitos pueblos ibers d'a capital suya, Sedeis, Sedeisken, conoixida por as inscripcions monetals. Encara no ha estau localizada, anque s'han proposau Sastago por pareixiu fonetico y Zaila por o important despoblau iberico que bi ha (Cabezo d'Alcalá). Miguel Beltrán Lloris interpreta en base a cantidaz de monedas en diferents chacimientos que o Cabezo d'Alcalá yera l'antiga Beligion.

Atras ciudaz importants d'o terreno sedetán estioron Kelse (en Viliella d'Ebro y Exelsa), que emitió dinars d'archent, Salduie (cerca de Chuslivol), Ildukoite (Oliet), Bernaba (Azuara), y Damaniu (no localizada).

Seguntes a visión cheneral de muitos autors mugaban a lo norte con os suessetans y con os ilerchez, con os ausetans a l'este, con os edetans a lo sudeste y con os celtibers a lo sudueste.

A relación con os edetans ye polemica, pus s'ha proposau que fuesen un mesmo pueblo u que tenesen orichen común. O pareixiu de nombre no ye significativo porque os edetans prenen nombre d'Edeta (Liria), y os sedetans de Sedeis.

Aproveitaban os recursos fluvials d'os ríos pa fer una agricultura de regano. Tamién comerciaban con atros pueblos porque en ixa epoca l'Ebro yera una rota comercial.

A moneda sedetana teneba como representacions un chinet con palma y una cabeza con tres delfins.

Se romanizoron pronto como atros ibers d'a costa y val d'Ebro. Bels sedetans s'alistoron en l'exercito romano y intervinioron en Italia en a guerra social, como demuestra o bronce d'Ascoli.