Spaghetti

Spaghetti oder Spagetti [ʃpaˈɡɛti], italiänischi Standardussprach [spa'get-ti] sind us Hertweizegriess härgestellti Teigware bzw. Nudle mit eme runde Quärschnitt, zwei Millimeter Durchmässer (gchocht) und öppe 25 cm Lengi. Us Italie sind d Spaghetti i dütschsprachigi Ruum cho.

D Bezeichnig Spaghetti isch us em Italiänische übernuu worde (lat. spacus „Bindfade“ → ital. spago „Schnuer“ → Diminutiv spaghetto → Plural spaghetti „Schnüerli“). Bsunders dicki Spaghetti wäred Spaghettoni, besonders dünni wäred Spaghettini. No dünner als Spaghettini sind d Capellini.

Z Dütschland wärded Spaghetti mit Eier teilwys au als Eierteigware aabotte. Ähnlich gformt, aber meist chürzer als Spaghetti, sind Eiernudle (italienisch Pasta all’uovo), wo s au als Bandnudle git. Fadenudle sind chürzer und dünner und wärded meistens in ere Suppe gässe. Im hütige China hets scho im 2. Jahrtuusig v. Chr. en Art Fadenudle gä. Die sind allerdings us Hirsemähl härgstellt worde.