Tipi

Tipi nennt ma s Zejt vo de noadamerikanischn Indiana. In da Lakota-Sproch hoasst thípi weatlich "sie wohna do". So hoasst im modeanan Lakota thípi aa "Haus", wei de Indiana heit in Haisan wohna.

A Tipi besteht aus am Gstej und aus Stanga (dinne Stämm vo Nodlbaama) und oana hoibkroasfeamign Blochan. Friara woa de Blochan aus Bisonleda. Noch da Fost-Ausrottung vo de Bison und da Ausgrenzung vo de Indiana in Reservatn is de Tipiblochn aus Seglduach. De Grundflächn vom Tipi is kroasrund und hod an Duachmessa vo 3 – 7 m. In da Mittn vom Tipi is de Feiastej, am Bodn liegn Blochan und Fej.

De moastn Tipis in oana Siedlung woan ned ogmoit oda vaziat. Bemoide Tipis woan wos Bsundas und ham Visiona, spirituelle Wesn, Kriag oda Jogdn doagstejt. Se san mit Natuafoam ogmoit woan und ham an Rang vom Bewohna sinalisiat. Vaziarunga mit Ohänga oda Medaillons woan bei de nordamerikanischn Indiana haifiga.