Tsarewitsj

Tsarewitsj (Russies: царе́вич, IFA tsɐˈrʲevʲɪtɕ) is ’n Slawiese titel vir die seuns van ’n tsaar. In 1797, tydens die bewind van Paul van Rusland, is die titel afgeskaf en vervang met tsesarewitsj slegs vir die regmatige opvolger. Sy jonger broers het die titel groothertog gekry. Die twee terme word dikwels verwar.

Aleksei Nikolajewitsj, die enigste seun van tsaar Nikolaas II, was die laaste lid van die Russiese keiserhuis wat tsarewitsj genoem is, hoewel hy eintlik die tsesarewitsj was.

In vroeër tye is die titel ook gebruik vir die afstammelinge van die khans (tsaars) van Kazan, Kasimof en Siberië nadat dié khanate deur Rusland verower is. Die afstammelinge van die afgesette koninklike families van Georgië het ook die titel tsarewitsj gekry tot in 1833, toe hul rang ná ’n mislukte staatsgreep verlaag is na dié van knjaz (prins).