Tubaantn

De Tubaantn, Tubanti of Tuihanti/Tvihanti warn nen Germaansen stam den at zik volgens de oolde tradisjonele geskiedenisse zo um en noabie t begin van n joartelling in t Oost-Neerlaand van rechtevoort zol vestigd hebn. Dr is weainig van öar bekeand. Wellich umdet ze weainig verskel maaktn, of umdet öare deelname an gevechtn zo kleain was det ze neet vake neumd wördn.

Op ne roondgaank duur Noord-West Europa van Germanicus in 14 noa Kristus, wör n germaansen stam de Marsi an evöln duur t Romeinse leager. De Bructeri, Usipeti en Tubanti treukn dr hen um de Marsi te helpn, mear ze verlöarn dee stried.

Eankele hoonderdn joarn later kömn de Tubanti wier in anraking met t Romeinse leager. Kets van t rabbat ebracht duur de ongeveuligheaid en hartvochtigheaid van n Romeinsen keaizer Konstantijn dn Grootn bie den zin anval op de Bructeri (308) kömn verskeaidene Germaanse stemme bie mekoar (ook de Tubanti) um t Romeinse Riek an te valn. Konstantijn slachn öar of.

Eankele joarhonderdn later gungn de Tubanti duur inmenging op in t grote stamverbaand van de Saksn.

Dr beent archeologise bewiezn det de Tubanti al lange van metaal- en Stoalmaakn wusn. De groondstof oer keump völle vuur in Tweante. De leaftied van de stoalmakeriejn geet terugge tot 280-350.

Rechtevoort kö'j Tubantia nog wierveendn in n naamn van t dagblad De Twentsche Courant Tubantia, de voetbalvereniges H.V.V. Tubantia (Hengel) en Tubantia Borgerhout (Antwoarpn), Voetbal en Athletiek Club De Tubanters oet Eanske, de Twentse Roeivereniging Tubantia (Hengel), Padveenderieje De Tubanten (Almelo) en de skeetverenige Tubantia (Riesn); de Tubantiasingel en Tubantiastroate in Eanske en in n naamn Tweante.