Urgeschichte

D Urgschicht (Sünonüüm: Vorgschicht oder Prehistorie) isch e Däilgebiet vo dr archeologische Disziplin Ur- und Früegschicht. D Urgschicht bezäichnet die eltisti Periode vo dr menschlige Gschicht. Si foot aa mit dr Zit, wo die erste Stäiwärkzüüg vor öbbe 2,5 Millione Joor ufdräte (vgl. Stammesgschicht vom Mensch) bis zur Epoche, wo die erste schriftlige Züügniss vorchömme, was je noch dr Region zu seer underschidlige Zite bassiert isch. D Erforschig vo däm Zitalter isch d Sach vo dr Archeologii und iire Hilfswüsseschafte.

D Früegschicht, wo nochhär chunnt, isch d Periode, wo s zwar Schriftkwelle git, wo mä aber ooni archeologischi Kwelle sich kä guet gnuegs Gschichtsbild cha mache. Druf chunnt d Gschicht im ängere Sinn, wo vor allem d Uswärtig vo schriftlige Kwelle s Bild vo dr Epoche brägt und die materielli Kultur zuesätzlig archeologisch erschlosse wird.