Vodevil

El vodevil foi un xéneru d'entretenimientu común nel teatru d'Estaos Xuníos y Canadá, d'entamos de los años 1880 hasta finales de los años 1930. Esti xéneru de "cultura-pop" foi desendolcáu dende estremaes influencies, incluyendo'l concert saloon, minstrel show, freak show, dime museum y lliteratura burlesca. El vodevil convirtióse nun de los tipos d'entretenimientu popular más famosos n'América del Norte, marcando la era del entretenimientu. Cada programa nocturnu taba compuestu d'estremaos actos separtaos y non rellacionaos. D'ente los componentes destacaben (ente otros) músicos (tanto populares como clásicos), baillarines, humoristes, animales adiestraos, magos, imitadores, acróbates, obres d'un actu o actos sueltos d'estremaes obres, atletes, celebridaes, trovadores y cortometraxes.

El vodevil ye un subxeneru dramáticu que consiste nuna comedia frívola, llixera y picante que da llugar a errores y situaciones cómiques,nel que s'alternen partes cantaes y númberos musicales. El so nome deriva del francés vaudeville.

Nel teatru, el vodevil nun apaeció hasta los entamos del sieglu XVIII. Primeramente nun foi más qu'una pequeña composición escénica, toda en cuplés, onde incluso'l diálogu yera cantáu. Fuzelier, D'Orneval, Alexis Piron, Lesage, etc., utilizaron los vodeviles pal Théâtre de la foire, d'onde pasaríen a la Comedia italiana, confundiéndose n'ocasiones cola Ópera cómica.