Xarazu

Xarazu
	Tipo de fenómeno meteorológico (es)
	Precipitación

El xarazu o pedriscu, ye una mena de precipitación que consiste en partícules irregulares de xelu. El xarazu produzse en tormentes intenses nes qu'hai gotes d'agua sobreenfriaes, ye dicir, entá líquides pero a temperatures per baxo del so puntu de conxelamientu (0º C). Esti fechu dase tanto en branu como n'iviernu, magar que'l fenómenu asocede nos díes de calorza.

L'agua frío necesita d'un niciu sólidu pa entamar el procesu de cristalización. Cuando estes gotes d'agua choquen con otres partícules xelaes o granos de polvu, cristalizen aína ya ensin dificultá. Nes torbonaes más intenses, pue producise precipitación xelada en forma de xarazu enforma grande, cuando ésti se forma nel senu de corrientes ascendentes fuertes. Nesti casu, la pella de xarazu pue caltenese más tiempu na atmósfera, teniendo mayor capacidá de xorrecimientu. Cuando dexa d'haber puxu hacia arriba, o el xarazu yá algama un tamañu consideráu, l'aire nun sofita'l pesu y el xarazu cái.

Símbolos meteorolóxicos:

Precipitación suave de xarazu o ñeve de pocu tamañu con o ensin lluvia.
Precipitación moderada o fuerte de xarazu o ñeve de pocu tamañu con o ensin lluvia.
Xarazada suave con o ensin lluvia.
Tormenta llétrica con xarazada.

Una pella de xarazu descomanadamente grande.

Les boles o pelles de xarazu son davezu pequeñes, namái dalgunos milímetros de diámetru. Sicasí, de xemes en cuando orixínense pelles muncho mayores, de varios centímetros darréu que na circulación ciclónica de la tormenta, les pequeñes boles ascienden y descienden varies vegaes formándose delles capes de xelu, unes sobro otres. Según el so tamañu, pueden ser namái un engorriu, facer daños n'automóviles y cristales o inclusive matar persones. La pella de xarazu más pesao rexistrada cayó en Bangladex, en 1986, y pesaba 1 quilogramu. La pella de xarazu más grande que rexistrao cayó n'Aurora, Nebraska el 22 de xunu del 2003 y tenía un radiu de 17,8 cm.