Alcelaphinae

Alcelaphinae Tydperk: Laat Mioseen tot Onlangs
'n Basterhartbees (Damaliscus lunatus)
Wetenskaplike klassifikasie
Koninkryk:	Animalia
Filum:	Chordata
Klas:	Mammalia
Orde:	Artiodactyla
Familie:	Bovidae
Subfamilie:	Alcelaphinae
Genera
Beatragus  Damaliscus  Alcelaphus  Connochaetes  Megalotragus †  Damalops †  Oreonagor †  Parestigorgon †  Parmularius †  Rabaticerus †  Rhynotragus †  Rusinoryx †  Damalacra †

Alcelaphinae is 'n subfamilie van die horingdraers, waartoe die wildebeeste, hartbeeste, bontebokke en ander soortgelyke spesies ewehoewige soogdiere behoort. Die familie is nou verwant aan die rooibok (Aepyceros melampus), wat soms ook in die groep ingedeel word.^[1]

Hierdie diere is groot en stewig met lange gesigte, lang pote, kort, stewige nekke en hoë skouers, terwyl die romp agter laer is. Huidkliere is agter die oë en op die voorpote geleë. Die horings is gekrom en by albei geslagte aanwesig. Die bulle word gemiddeld effens groter as die koeie.

Alcelaphinae kom voor in vogtige graslande en oop bosse reg oor Afrika suid van die Sahara, met die uitsondering van die reënwoudgordel. Fossiele is tot in Indië gevind, maar meer onlangse fossiele word ook in Noord-Afrika aangetref. Die diere leef in groot kuddes. Sommige spesies, soos die blouwildebees en die basterhartbees, is van die algemeenste wildsbokke wat op die Afrika-savanne voorkom en onderneem jaarliks skouspelagtige trektogte. Gras vorm by alle spesies 'n belangrike deel van die dieet. Alle spesies is goeie hardlopers en kan vinnig op die vlug slaan.

1. ↑ Wilson, Don E. & Reeder, DeeAnn M. (editors). 2005. Mammal spesies of the World. A Taxonomic and Geographic Reference (3rd ed), Johns Hopkins University Press, 2,142 pp. Available online