Kolmanskop

Kolmanskop
Lugfoto van die dorp
Kolmanskop
Koördinate: 26°42′14″S 15°13′56″O / 26.70389°S 15.23222°O / -26.70389; 15.23222
Land	Namibië
Streek	ǀǀKaras
Hoogte	0,19 m (,62,51 ft)
Tydsone	UTC+2 (SAST)

Kolmanskop is 'n spookdorp in die Namibwoestyn in die suide van Namibië, 10 km binnelands vanaf die hawestad Lüderitz. Dit is vernoem na die transportryer Johnny Coleman, wat tydens 'n sandstorm sy ossewa verlaat het om langs 'n helling teenoor die nedersetting te skuil.^[1] Dit was eens 'n klein, maar baie ryk myndorpie. Tans is dit 'n gewilde toeristebestemming wat deur Namdeb (Namibië-De Beers) bestuur word.

In 1908 ontdek Zacharias Lewala 'n diamant in die gebied en wys dit aan sy toesighouer, Augustus Stauch, 'n Duitse spoorlyn-inspekteur. Met die besef dat die gebied ryk aan diamante is, het Duitse mynwerkers begin instroom. Kort daarna verklaar die Duitse regering 'n groot gebied as 'n "Sperrgebiet", en begin om die diamante in die veld te ontgin.^[2]

Die eerste mynwerkers het hul nuutgevonde rykdom gebruik om die dorp te bou. Die argitektoniese styl van 'n Duitse dorpie is nagevolg en geriewe en instellings is aangelê, insluitend 'n hospitaal, danssaal, kragstasie, skool, kegel-stegie, teater en sportsaal, casino en ys-fabriek. Die eerste X-straal-stasie in die suidelike halfrond, asook die eerste trem in Afrika is opgerig, en die dorp is per spoor met Lüderitz verbind.

Ná die Eerste Wêreldoorlog het die dorp stadig agteruit begin gaan, toe die diamantveld uitgeput begin raak het. In 1928 is van die rykste diamantdraende deposito ooit 270 km suid van Kolmanskop (op die strand naby die Oranjerivier) ontdek. Baie van die dorp se inwoners het die stormloop na die suide gevolg en hulle huise en besittings agtergelaat. Die dorp was uiteindelik in 1954 verlate.

Die geologiese kragte van die woestyn het oorgeneem en toeriste kan nou kniediep in sand deur die huise loop. Kolmanskop is veral gewild onder fotograwe wat die natuur se uitwerking op die eens vooruitstrewende dorp wil dokumenteer. As gevolg van die dorp se ligging in die Sperrgebiet moet toeriste 'n permit kry om die dorp te besoek. Permitte kan by die hek in die dorp gekoop word. Toere vertrek daagliks om 09:30 en 11:00 (plaaslike tyd, GMT+2), en om 10:00 op Sondae.

1. ↑ "Kolmanskop". Namibia Travel Companion 2013 (in Engels). Namibia Travel Companion. Geargiveer vanaf die oorspronklike op 2 Junie 2017. Besoek op 11 November 2013.
2. ↑ Schneider, G. (2008). Treasures of the Diamond Coast. Windhoek: MacMillan Education. ISBN 978-99916-0-968-3.