Lansetvissies

Cephalochordata
Wetenskaplike klassifikasie
Koninkryk:	Animalia
Filum:	Chordata
Subfilum:	Cephalochordata

Die lansetvissies (Cephalochordata) is 'n groep rugstringdiere sonder skedel, werwelkolom of kake.

Vandag is daar net twee families met drie genera en ongeveer twintig spesies, maar hierdie groep moet baie oud wees en 'n groter verskeidenheid gehad het. 'n Fossiele vorm van 500 miljoen jaar gelede Pikaia behoort dalk tot hierdie groep. Omrede hulle liggaam geen harde dele het nie, is fossiele seldsaam. Daar is daarom min bekend oor hulle geskiedenis.

Lansetvissies het 'n ingegrawe lewenswyse in die seebodem op dieptes tussen 5 en 30 meter. Hulle filter plankton uit die water. Hulle is tot 5 cm lank en het liggevoelige orgaantjies aan die sykante van die kop.

Vanweë hulle anatomie is hulle baie belangrik vir die kennis van die Chordata omdat hulle toon watter bou die eerste Chordadiere se liggaam oorspronklik gehad het. Hulle het 'n notochord wat 'n elastiese rugstring vorm wat strek van die neuspunt tot die stert en waaraan die spiere van hul lyf geheg is. Hulle het geen ledemate nie. 'n neurale buis lê bo die notochord. In die embrionale stadium van alle chordadiere kan so 'n notochord aangetref word.