Indischer Subkontinent

As Indische Subkontinänt wird d Landmasse südlig vom Himalaya bezäichnet, wo d Staate Bangladesch, Bhutan, Indie, Nepal, Pakistan und Sri Lanka druf lige. Er isch e Däil vo Südasie und geografisch cha mä s Gebiet au dur die bäide groosse Strööm Indus und Ganges as natürligi Umgränzig beschriibe: dr Indus isch 3.180 km lang, dr lengsti Fluss uf em Subkontinänt, won em au dr Naame git, und dr wichdigsti Stroom in Pakistan. Dr Ganges isch 2.511 km lang und isch dr wichdigsti Fluss in Indie und Bangladesch.

Ass er as „Subkontinänt“ bezäichnet wird, chunnt drvo, ass die Landmasse nit e Däil vo dr Öirasische Blatte isch, sondern uf dr Indische Blatte lit. Die Lithosfääreblatte het sich im Lauf vo dr Ärdgschicht vom südlige Groosskontinänt Gondwana glööst und sich vo dr Süüdhalbchuugele gege Norde bewegt. Erst wo si mit dr Öirasische Blatte zämmegstosse isch, het sich dr Himalaya afo uffalte und d Landmasse häi sich verbunde.