John F. Kennedy

De John Fitzgerald Kennedy (* 29. Mai 1917 z Brookline, Massachusetts; † 22. November 1963 z Dallas, Texas) isch de 35. US-Amerikanischi Präsident gsi. Sini Amtszit het im 1961 aagfange und het mit sinere Ermordig im 1963 z Dallas es abrupts Änd gfunde. De Kennedy isch Mitglid vo de Demokratische Partei gsi.

Sini Wahl isch in zweierlei Hisicht öppis bsunders gsi, wil er de jüngscht Präsident isch gsi, wo in des Amt gwählt worde-n-isch und de erschte (und bislang einzigschti) Katholik. Ussepolitisch prägt gsi isch sini Amtszit vo de Kubakrise, wo d Wält kurz vor eme Atomchrieg gschtande-n-isch. Um d Hintergründ vo sinere Ermordig z Dallas (s Attentat uf de John F. Kennedy) gits bis hüt Verschwörigstheorie.