Klingnauer Stausee

Dr Stausee vo Chlingnau isch e künschtleche See a dr Aare im Kanton Aargau.

Dr See lyt im Jura i dem Taal, wo d Aare derdur vom Middelland gäge Norde zum Rii lauft. Uf dr rächte Syte sind d Gemeind Döttige und d Stadt Chlingnau und uf dr lingge Syte d Dörfer Böötschde und Gippige.

Dr Stausee isch fürs Chraftwärch vo Chlingnau i de 1930er Joor gmacht worde.

Da, wo jetz der See lyt, isch d Aare früener dur ne wyti Auelandschaft gloffe.^[1] Zwüsche Däntsche uf beidne Syte, wo höcher sind als s Land näbedra, und em Stauweer het der See sin Platz. Er isch nid töif, und grad wäge däm sich die grossi Wasserflechi für d Wasservögel guet. Yheimeschi und au Zugvögel chömed dörthi, und middlerwyl zellt dr See zu de wichtige Naturschutzpiet vo dr Schwiiz. Rund ume See het’s Fäldwääg, wo für d Wanderer un d Velofaarer agnääm sind, und am Uufer e spezielle Uussichtsdurm zum d Tier uf em Wasser z beobachte.

Dr Kanton Aargau möcht en Deil vom See usbaggere, wil dä vil z schnäll tuet zuewachse. Das Projäkt isch schwirig wäge giftige Substanze, wo me-n im Seebode gfunde het.^[2]

1. ↑ Rudolf Siegrist: Die Aare bei Klingnau: eine topographisch-naturwissenschaftliche Studie. Züri 1962
2. ↑ Kanton Aargau will giftigen Schlamm in den Rhein pumpen Artikel uf badische-zeitung.de vom 2. Juli 2014