Mercurius

De Mercurius, uf tütsch Merkur (latiin. Mercurius, -ī; altlatiinisch: Mirqurios) isch de röömisch Gott vom Handel. Er isch mitem griechische Hermes gliichgsetzt wore und hett denn immer mee Züüg vom Hermes agnoo und zum Götterbott wore, wo au di Toote i d Underwelt gfüert het. Au sini Muetter Maia isch vo de Grieche öbernoo wore. Z Rom hett er e Tempel bim Circus maximus ghaa.

D Römer hend au keltischi und germanischi Götter Mercurius gnennt (Interpretatio Romana). Germanisch sind de Mercurius Channio und Hranno, helvetisch de Mercurius Cissonius. I de Gallische Provinze isch er hüüffig miteme Güggel oder emene Widder dargstellt wore.