Olaf Scholz

Dr Olaf Scholz (* 14. Juni 1958 z Osnabrück) isch e dytsche Bolitiker (SPD) un syt em 8. Dezämber 2021 Bundeschanzler vu dr Bundesrepublik Dytschland. Dervor isch er vu Merz 2018 bis zue syre Wahl zum Bundeschanzler Bundesminischter vu dr Finanze un Stellverdrätter vu dr Bundeschanzleri Angela Merkel gsii (syt Oktober 2021 gschäftfierend).

Vum 7. Merz 2011 bis zum 13. Merz 2018 isch er dr Erscht Burgermaischter vu Hamburg gsii. Vum Novämber 2007 bis Oktober 2009 isch er Bundesminischter fir Arbet un Soziales gsi. Är isch vu Novämber 2009 bis Merz 2018 Vorsitzende vu dr SPD z Hamburg gsi, vu Oktober 2009 bis Merz 2011 stellverdrättende Vorsitzende vu dr Bundesdagsfraktion un vu Novämber 2009 bis Dezember 2019 stellverdrättende Bundesvorsitzende vu dr SPD. Vu Februar bis April 2018 isch er kummissarische Barteivorsitzer vu dr SPD gsi.

Vum Oktober 2005 bis Novämber 2007 isch dr Scholz Erschte Barlamentarische Gschäftsfierer vu dr SPD-Bundesdagsfraktion gsi. Vu Mai bis Oktober 2001 isch er Innesenator vu dr Freie un Hansestadt Hamburg un vu 2002 bis 2004 Generalsekretär vu dr Bundes-SPD gsi.