Paarhufer

Baarhuefer
Giraff (Giraffa camelopardalis)
Systematik
Überklass: Chiifermüüler (Gnathostomata) Reije: Landwirbeldier (Tetrapoda) Chlass: Süüger (Mammalia) Underchlass: Hööcheri Süüger (Eutheria) Überordnig: Laurasiatheria Ordnig: Baarhuefer
Wüsseschaftlige Name
Artiodactyla
Owen, 1848
Underordnig
Söiartigi (Suina) Schwielesooler (Tylopoda) Döier (Ruminantia) Flusspfärd (Cetancodonta)

D Baarhuefer, au Baarzeechigi Huefdier oder Baarzeecher (Artiodactyla oder Paraxonia), si in dr klassische biologische Süstematik en Ornig vo de Süüger (Mammalia). Es handlet sich um Dier, wo vor allem Pflanze frässe, wo im Geegesatz zu de Umbaarhuefer mäistens dur e graadi Zaal vo Zeeche (zwäi oder vier) charakterisiert si. Zu dere Grubbe ghööre e baar vo de wirtschaftlig bedütendste Süügergrubbe wie Rinder, Söi, Kameel, Gäisse und Schoof, aber au anderi bekannti Dier wie Giraffe, Flusspfärd, Hirsch oder Antilope. Dank molekulare Undersuechige isch s zimlig sicher, ass d Baarhuefer parafületisch in Bezug uf d Waalfisch si. Das häisst, ass e baar Grubbe (bsundrigs d Flusspfärd) nööcher mit de Waalfisch as mit de übrige Verdräter vo dere Ornig verwandt si. Modärni fülogenetischi Süstematike fasse doorum d Baarhuefer und d Waal zum ene gmäinsame Taxon Cetartiodactyla zämme. D Baarhuefer si also e „Formtaxon“ – e Grubbe, wo zwar käi süstematischi Äinhäit bildet, aber dur gmäinsami Merkmol charakterisiert wird.

D Baarhuefer cha mä in vier Underornige iidäile:

• Die Söiartige (Suina) bestöön us de Ächte oder Altwältlige Söi und de Naabelsöi oder Pekaris.
• D Flusspfärd ghööre in en äigeni Underornig, d Cetancodonta.
• D Kameel – die nöiwältlige Arte iigschlosse – si die äinzige rezänte Verdräter vo dr Underornig vo de Schwielesooler (Tylopoda).
• D Döier (Ruminantia) bestöön under anderem us Giraffeartige, Hirsch und Horndrääger, wo zum Bischbil d Rinder, Gäisseartige und Dier, wo as Gazälle und Antilope bezäichnet wärde.