Regisseur

En Regisseur, wyblich e Regisseurin (vo frz.: régisseur, régir leite), au Schpielleiter gnännt, füehrt Regie und isch demit traditionell nebed em Schauschpieler di entscheidendi Person bi dr Uuffüehrig vomene Schtück. Als Alternative zur Zentralgwalt vom Regisseur sind verschiedeni Aasätz vo (meh oder weniger) gliichberechtigte Regieteams entwicklet worde.

Es git de Bühneregisseur für Schauschpiel, Musical, Opere, Operette und anderi Bühne-Werch im Theaterbereich, de Filmregisseur für d Filmkunscht, de Hörschpielregisseur für Hörschpiel und künschtlerischs Feature und de Fernsehregisseur für Fernsehsendige. S gmeinsame vo dene verschiedene Regietätigkeite, isch d Verantwortig für di künschtlerisch Gschtaltig vomene Projekt, wo i dr Regel uf ere schriftliche Vorlaag basiert.