Theodosius I.

Theodosius I.
Kaiser vom Römische Riich
Regierigsziit	19. Januar 379 – 15. Mai 392 (Kaiser in Ostrom; 15. Mai 392 – 17. Januar 395 (vom ganze Riich)
Name	Flavius Theodosius (bis zur Droonbestiigig); Flavius Theodosius Augustus (as Kaiser)
Uf d Wält cho	11. Januar 347
Geburtsort	Cauca, oder Italica, in dr Nööchi vo Sevilla, im hütige Schbanie
Gstorbe	17. Januar 395
Dodesort	Mailand
Begrabe	Apostelchille z Konstantinopel
Vorgänger	Valens in Ostrom Gratian in Westrom Valentinian II. in Westrom
Nochfolger	Arcadius in Ostrom; Honorius in Westrom
Verhürotet mit	1) Aelia Flaccilla (?-385) 2) Galla (?-394)

Dr Theodosius I. (griechisch Θεοδόσιος A', äigentlig Flavius Theodosius), au bekannt as Theodosius dr Groossi (* 11. Januar 347 z Cauca im hütige Schbanie; † 17. Januar 395 z Mailand), isch vo 379 bis 394 Kaiser im Oste vom Römische Riich gsi und vom Septämber 394 aa für e baar Möönet dr letschti Eläiherrscher vom Gsamtriich.

D Regierigszit vom Theodosius isch verbunde mit iischniidende Verändrige im Imperium Romanum. So isch 382 zum erste Mol e groossi Grubbe vo gotische Barbare as autonome Verband under iirem äigene Herrscher as Föderate uf em Boode vom Riich aagsiidlet worde. Im Innere het dr Theodosius s Christedum faktisch zur Staatsreligion erhoobe und Gsetz gege s Häidedum und bsundrigs gege christligi Heresie erloo. Noch eme Bürgerchrieg het dr Theodosius für churzi Zit s Imperium as Ganzes regiert. Noch sim Dood 395 isch s Riich ufdailt worde und sini bäide Söön häi jeede d Herrschaft über äi Riichsdäil übernoo. Faktisch isch das die ändgültigi Drennig vom Römische Riich in e Weströmischs und e Oströmischs Riich, au wenn d Zitgenosse das nid eso gsee häi und s Imperium Romanum au staatsrächtlig immer non e Äinhäit gsi isch.